Materi Bab Geguritan (puisi Jawa)

 

Materi Pembelajaran

Bab Geguritan (Puisi Jawa)

1.       Geguritan Tradisional

a. Puisi Tembang:

- puisi tembang cilik (macapat)

- puisi tembang tengahan

- puisi tembang gedhe

b. Parikan

c. Guritan

d. Syingir

e. Lelagon bocah

2.       Puisi jawa Modern

Geguritan (puisi Jawa gagrak anyar / puisi bebas)

Tuladha:

 

Di ngapura, Bapa

Dening Gunadi Aryo

 

Dingapura Bapa

Esuk iki manuke bapa da-culake

Mabur saparan-paran

Dhek wingi katon nglentruk tanpa daya

Arep matur Bapa wis ngantor

Ngendikane Ibu Bapa lembur

Aku wis turu nalika Bapa kondur

Bapa

Wingi ana kutilang lan trocokan

Ngoceh ing cedhak kurungan

Dheweke crita

Bab endahe nuswantara

Kang bakal tidhem amem tanpa ocehing kukila

Kummel kucem merga surya cidra

Bab garudha kang sengkleh swiwine

Pucet tanpa ludira

Merga manungsa kang srakah lan

Seneng ngumbar nistha

Atiku trenyuh

Weruh manuke bapa lemes

Nelangsa lan tanpa daya

Jroning kunjara

Dingapura Bapa

Esuk iki manuke bapa dak-culake

Mabur saparan-paran

Ing pangentha

Byar padhang gagat rahina

Manuke bapa bali ngoceh

Ngancani aku mapag srengenge

Ngipatake tindak nistha kang remeh

Eklasna

 

Eklasna aku lunga biyung

sanadyan ing ndhuwur langite katon mendhung

eklasna aku lunga bapa

lungaku sangu ati lapis waja

ora perlu panjenengan galih

ing paran aku ora bakal mati amarga ngelih

mumpung isih esuk

kanthi pangestu kang matumpuk-tumpuk

gunung lawu lan semeru mung katon sapunthuk

kabeh bakal taklangkahi

sanadyan kudu nasak bebondhotan eri

aku lunga perlu makarya

ora mung angon kebo ing ara-ara

sanadyan aku ngerti

golek gawean angel yen tanpa koneksi

lan kudu nganggo gambar Jendral Sudirman sakethi

sugeng enjing bapa biyungku

sugeng enjing desaku

kang tansah kinemulan langit biru

eklasna liya dina isih bisa ketemu

 

3.       Materi Konsep:

 

Struktur dan kaedah geguritan

-Geguritan saka tembung lingga ‘gurita’ yaiku owah-owahan saka tembung

‘gerita’. Dene tembung ‘gerita’ iku saka tembung lingga ‘gita’ kang nduweni teges

tembang utawa syair.

 

-Ana uga kang nduweni panemu yen geguritan iku saka tembung lingga ‘gurit’ kang nduweni teges tulisan. 

-Miturut kamus, geguritan yaiku tembang uran-uran utawa karangan kang pinathok kayadene tembang, nanging guru gatra, guru lagu, lan guru wilangane ora ajeg.

-Miturut Raminah Baribin (2005) geguritan iku iketaning basa kaya dene syair.

Mula saperangan pawongan ana kang ngarani utawa nyebut syair Jawa gagrag

anyar.

 

Saka maneka teges geguritan ing dhuwur bisa kajupuk dudutane (kesimpulane), geguritan yaiku wohing kasusastran Jawa anyar awujud syair kang tanpa nganggo paugeran/pathokan tartamtu (guru gatra, guru wilangan, lan guru lagu).

Titikane geguritan yaiku:

a.         Ora kawengku ing pathokan

b.         Dudu basa padinan

c.         Migunakake tembung-tembung kang pinilih

d.         Cacahe larikan ora katemtokake

e.         Isine mentes

f.          Arang-arang nggunakake tembung-tembung pangiket

 

Unsur pembangun geguritan

Geguritan Geguritan bisa kanggo medharake utawa ngandharake isine ati lan aweh piwulang, pepeling, sarta pitutur marang wong sing maca. Geguritankawujud saka tema kang diandharake dadi wujud geguritan. Sajroning geguritan ngemot nilai-nilai utawa amanat kang katujokake marang pamaos. Tembung kang dienggo ing geguritan migunakaken tembung kang pinilih, kanthi sarana dasanama, purwakanthi, tembung garba, tembung saroja lan uga lelawaning basa. Tembung-tembunge geguritan iku endah lan enak kawaca.

4.       Materi Prinsip:

Karakteristik geguritan

Geguritan iku:

- Cekak yaiku ora awujud ukara kang nglandrah

- Mentes yaiku tembunge duwe makna kang jero

- Endah ngemu purwakanthi swara, sastra utawa lumaksita

- Tetembungane pinilih.

5.       Materi Prosedur:

a.    Langkah-langkah memparafraseke geguritan

b.    Gancaran kuwi ing basa Indonesia diarani prosa. Nggancarake ateges ngowahi tembang utawi geguritan dadi gancaran (prosa). Dadi nggancarake padha karo "memprosakan" utawa tembunge liya "memparafrase". Sadurunge gawe gancaran kudu mangerteni cara-carane ngancarake.

Carane ngagancarake mangkene:

1. Ukara-ukarane tembang utawa geguritan kang mawa tembung baliswara kudu diudhari, dhapukane ukara kawolak-walik.

2. Menawa ana tembung kawi (tembung Jawa kuna) kudu diowahi dadi tembung Jawa anyar kang lumrah dianggo utawa dirungokake sabendinane.

3. Menawa ana tembung garba (tembung sandi) kudu diudhari.

4. Kanggo nglarasake ukara supaya ora kaku bisa mbuwang utawa ngilangi tembung sawetara. Mangkana uga tumrap ater-ater lan panambang.

5. Pada/bait kang sakawit wujud bait-bait, kaewahana dadi paragraf kanthi ejaan kang bener. Nggatekake titik, koma, tandha pitakon, tandha prentah, lan sapanunggalane.

 

Langkah-langkah menulis teks geguritan

Carane nulis geguritan yaiku:

1.  Nemtokake tema,

2.  Milih tetembungan kang mentes

3.  Endah lan cekak,

4. Menehi irah-iarahan kang junbuh karo isine geguritan

 

Langkah-langkah membaca indah geguritan

Maca Geguritan

Geguritan bisa kanggo medharake utawa ngandharake isine ati lan aweh piwulang, pepeling, sarta pitutur marang wong sing maca. Sawijining geguritan bakal luwih gampang olehe nggoleki amanat utawa piwulang kang ana sajroning geguritan kanthi cara diparafrasekake luwih dhisik. Parafrase geguritan tegese proses owah-owahan saka wujud geguritan didadekake wujud gancaran utawa paragraf, kanthi ancas supaya maknane/tegese geguritan luwih cetha lan gamblang.

 

Geguritan iku bisa dirasakake kanthi maca utawa ngrungokake, satemah bisa:

1. Nemokake pesen (amanat/piwulang) kang kamot ing sajroning geguritan,

2.  Nemtokake sebab kang ndadekake endahing geguritan,

3. Gawe gambaran tumrap geguritan kang diwaca utawa dirungokake.

 

Kang perlu digatekake jroning nyulih wedharaning geguritan yaiku:

1. Maca tulisan (naskah) kanthi setiti

2. Ngira-ira tetembungan kang diilangi, nuli mbalekake

3. Njingglengi ten ana pasemin utawa pralambang sing dienggo

4. Njarwani (menafsirkan makna) pasemon utawa pralambange

5. Ngupakara (merangkaikan) ukara-ukara saka panaliten dadi sawijining gancaran

 

Kanggo ngelingake maneh apa wae sing kudu digatekake nalika maca geguritan, ing

ngisor iki perangan-perangan sing kudu disemak lan diugemi,yaiku:

1. Wirama (irama/lagu)

Irama kudu digatekake nalika maca geguritan, umpamane banter, alon, cetha utawa samar, lan

sapanunggalane. Nalika maca geguritan sing surasane semangat kudu nyuwara sora, beda

nalika maca geguritan sing surasane ngemu kasusahan, kudu alon, alus, lan melas.

2. Wirasa (rasaning swasana ati)

Surasane utawa isine geguritan kudu dimangerteni tegese utawa karepe. Nuli anggone maca

ngetrepake utawa nyelarasake karo isining geguritan, yaiku susah, seneng,wibawa, getun,

nesu lan sapanunggalane.

3. Wiraga (obahing awak)

Obahing awak yaiku aja kaku, luwes wae, mlaku uga prayoga, ngobahake peranganing awak kanggo mbangun swasana. Pasemon, praenan kudu selaras karo isining geguritan nanging aja banget-banget.

4. Wicara (pocapan)

Pocapan sing cetha nalika ngucapake aksara swara, wanda, lan tembung.

Jenise geguritan :
1. ode
    yaiku geguritan kang surasane babagan pangalembono marang wong liyo, negara, lan apa dene kang dianggep luhur.
2. Hymne
    yaiku geguritan kang surasane babagan pangalembono marang Gusti.
3. Elegi
    yaiku geguritan kang surasane babagan panalongso.
4. Epigram
    yaiku geguritan kang surasane babagan piwulang-piwulang moral, nilai hidup kang becil lan bener.
5. Satire
    yaik geguritan kang surasane ngenyek utawa ngece kanthi kasar lan landhep.
6. Romansa
    yaiku geguritan kang surasane babagan katresnan.
7. Balada
    yaiku geguritan kang surasane babagan cerita utawa lakn kang nyoto utawa mung lamunane   pujangga.

 1) Struktur Fisik

a) Pamilihe tembung (diksi). Pamilihing tembung uga diarani diksi. Tembung-tembung kang ana sajroning geguritan biasane nduweni teges konotatif, asipat polisemi, lan nduweni teges rowa (abstrak). Pamilihing tembung kang trep bisa ngasilake imajinasi kang manjila. 

b) Lelewaning basa (Majas) yaiku tembung kang digunakake penyair kanggo nyaritakake sawijing bab kanthi cara mbandhingake karo barang utawa tembung liyane.

c)  Purwakanthi (Rima/ritma) yaiku mbaleni swara (vocal), mbaleni tembung, kelompok tembung (frasa) utawa mbaleni ukara. Rima utawa sajak utawa persamaan bunyi kanggo nyiptakake kaendahan lan kekuatan sawijining geguritan. 

d) Tipografi yaiku larik-larik utawa gatraning geguritan kang tinulis mawa pada utawa bait. Bab kuwi kang mbedakake antaraning geguritan lan gancaran.

 

2) Struktur Batin.

Struktur batin ing geguritan kaperang dadi papat, yaiku :

a)  Bakuning gagasan/ tema (sense); tegese punjeraning bab kang ndadekake geguritan kuwi dumadi. Utawa gagasan pokok kang dikarepake panulis/penyair. Tuladha tema: sosial, moral, politik, agama, individu, lan sapiturute.

b)  Pangrasane penyair/; yaiku Tembung-tembung kang dianggo ana sajroning geguritan nduweni teges lan nduweni fungsi kanggo manjilmakake rasa-pangrasa. Rasa-pangrasa kuwi nduwe sipat rowa lan kompleks. Sing kalebu rasa-pangrasa kayadene: simpati, empati, antipati sedhih, susah, seneng, kangen, gumun, lan sapiturute.

c)  Nada utawa sikap penyair marang “pembaca”; Tegese patrap (sikap) sing digunakake ana sajroning geguritan. Tuladha: ngguroni, nuturi, ngenyek, muji, nyemoni, utawa patrap liyane.

d) Amanat/ pesen; tegese bab kang pengen diwedharake penyair/panulis marang pamaos. Amanat kuwi ora tinulis kanthi terang trawaca ananging sinandhi ana pangrakiting tembung-tembung.

e) Suasana; tegese kahanane batin/jiwa pamaos sawise maca geguritan. Dadi, geguritan nduweni tujuan kanggo mbangun suasana batin pamaos geguritan.